Follow by Email

නිර්වාණ ධර්ම බ්ලොග් අවකාශය | Nirvana Dhamma BLOG

About this Blog | මෙම බ්ලොග් අඩවිය ගැන...

"මෙය “නිර්වාණ ධර්ම“ වෙබ් අඩවියට සමගාමීව ඔබ වෙත ලබාදෙන බ්ලොග් අඩවියයි! මෙසේ අවස්ථාවන් රැසක් තුලින් සත්ධර්මය කැටිකොට ලබාදෙන්නේ අතිශයින්ම බුද්ධිමත් සැබෑම මිනිසුන් වෙත පමණයි! ඔබේ ආගම ජාතිය කුලය තත්ව තානාන්තරය කුමක් වුවත් සැබෑම මිනිසෙක් ලෙසින් ප්‍රයෝජනයට ගෙන යහපත, සැබෑ සතුට, සැනසීම උදාකරගැනීම පිණිස “නිර්වාණ ධර්ම“ වෙතින් වෙන් වන අවකාශයයි!“
"This is the BLOG of "Nirvana Dhamma" web site which is Strictly for Human beings only! No matter what your status in this world is, No matter what you believes on, No matter what your religion is, Only matter is that whether you are a human being or not to gain the maximum benefits through all these efforts!"

Friday, December 14, 2012

ජාති

පෙර ලිපිය තුල උපාදාන හේතුවෙන් භවයට පත්වන අයුරු අපි විස්තර විග්‍රහ කරලා ගත්තා. දැන් භව පච්චයා ජාති හෙවත් භව හේතුකොටගෙන ජාති හටගන්නා ආකාරය විස්තර කරගන්නට තමයි මේ ලිපිය තුලින් උත්සාහ කරන්නේ. 

ඉතින් ත්‍රිපිඨක ධර්මය තුල මෙසේ තියෙනවා. 

“තත්ථ කතමා භව පච්චයා ජාති: යා තෙසං තෙසං ධම්මානං ජාති සඤ්ජාති නිබ්බත්ති අභිනිබ්බත්ති පාතුභාවො, අයං වුච්චති භව පච්චයා ජාති.“ 

“එහි භව ප්‍රත්‍ය යෙන් ජාති කවරෙ යත්: ඒ ඒ ධර්මයන්ගේ යම් ඉපැද්මෙක් මොනොවට ඉපැද්මෙක් නිපැද්මෙක් වෙසෙසින් නිපැද්මෙක් පහළවීමෙක් වේද, මේ භව ප්‍රත්‍යයෙන් ජාති යයි කියනු ලැබේ.“ 

මේ තියෙන්නේ භව ප්‍රත්‍යයෙන් ජාති පහළවීම කියන්නේ මොකක්ද කියලා ත්‍රිපිඨක ධර්මය තුල පැහැදිලි කරලා තියෙන එක්තරා කොටසක්. ඉතින් මේ ජාති කියන්නේ මොනවද කියලා මුලින්ම තෝරගන්න එපැයි නේද? 

කට්ටියක් ජාති කියන්නේ ඉපදීමට කියනවා, තවත් කට්ටියක් නොයෙක් නොයෙක් ආගම් ජාති, කුලමල ජාති වගේ දේවල් ගැන කථා කරනවා, තවත් පිරිස් නොයෙක් නොයෙක් ජාතියේ සත්තු ගැන කථා කරනවා, තවත් පිරිසක් නොයෙක් ජාතියේ බඩු භාණ්ඩාදිය ගැන කථා කරනවා... දැන් ඉතින් මේ භව හේතුවෙන් ඇතිවන ජාති මේ අතරින් කුමන ජාතියද කියලා ගැටලුවක් එහෙම එනවද? ඔව්නේ මට නම් ආවා. ඒ නිසාම ඒක නිසි ලෙසින් තෝරගන්නටත් හැකිවුණා. ප්‍රශ්ණයක් නැතිනම් අපි පිළිතුරු හොයන්නේ නෑනේ නේද? ඉතින් මේ ගැටලුව ඔබටත් තියෙනවා නම් අපි හැකි අයුරින් එය තෝරා බේරා ගනිමු. 

ත්‍රිපිඨක සත්ධර්මය තුල මජ්ඣිම නිකායට අදාල “අරියපරියේසන“ නම් සූත්‍ර දේශනාව තුල මෙන්න මෙහෙම විස්තරයක් තියෙනවා. 
මෙහි දීලා තියෙන සිංහල අර්ථය මෙසේයි... 
සරලව කිව්වොත් මේ කොටස තුල බුදු හිමියන් විසින් “ජාති ධර්ම“ කියන්නේ මොනවද කියලා පෙන්නලා දීලා තියෙනවා. දරුවෝ දැසි දාසයෝ ආදී පුද්ගලයින්, එළුබැටළුවෝ කුකුළන් ඌරන් ආදී සතුන්, රන් රිදී ආදී ද්‍රව්‍ය වස්තු ජාති ධර්ම වශයෙන් පෙන්වා දී තිබෙනවා. මෙන්න මේවගේ ජාති ධර්මයන්ට තණ්හාවෙන් ඇලී බැදී සිටින තාක් ඔබත් මමත් ජාතිය ස්වභාව කොට ඉන්නවා කියලාත් කියනවා. ඒ විතරක් නෙවේ එසේ ජාතියක් ස්වභාව කරගෙන ඉන්නාතාක් මේ වගේ ජාති ධර්මයක් සොයනවා කියලාත් කියනවා. 

දැන් ඉතින් කාරණය පැහැදිලියි. පටිච්ච සමුප්පාදයේ අනෙක් හැම අංගයක්ම වගේ මේ අංගයත් මේ මිනිසුන් ලෙසින් පිලිගන්න අපිට විතරක් උරුම දෙයක් නෙවේ. අපි ඇලෙන ගැටෙන සත්ව, පුද්ගල, ද්‍රව්‍ය, වසතු ලෙසින් දෘෂ්ඨි අරගත්ත අනෙක් සෑම සියලු දෙයකටමත් මෙය පොදුයි. එය එසේ විය යුතුයිනේ මන්ද මේ හේතු ඵල දහමයි. විශ්වයේම පැවැත්ම තියෙන්නේ මේ ධර්මතාවය මතයි. 

ඉතින් මම මේ ලිපි තුල හරහා ඔබට බොහෝ විට කියන්නට උත්සාහගත්ත කරුණක් තමයි මේ ජීවත් වෙලා ඉන්න කාලය තුල ඒ කියන්නේ ඒ ඒ මොහොතේ අපි තුල පටිච්ච සමුප්පාද ධර්මය ක්‍රියාත්මක වීම තුලින් අපි දුකට පත්වෙන ආකාරයත් ඒ කටයුතු නිසා කොහොමද අපගේ පැවැත්ම තහවුරු වෙමින් නැවත නැවත උපතක් සිද්ධ වෙන්නේ කියන කාරණා 2ක් ඇතිබව. 

ඉතින් අපිට ඕනෑම මොහොතක මේ අත්බැවය තුලම නිවන අවබෝධ කරගන්නට හැකිවෙනවා කියන්නේ මෙන්න මේ ප්‍රවෘත්ති පටිච්ච සමුප්පාදය හෙවත් මේ වෙලාවේ අප තුල සිද්ධ වෙන් සිද්ධිය තේරුම් ගෙන එය නිරෝධකිරීම තුලිනුයි. ඒකේ ඵලය තමයි නැවත පැවැත්මට පත්වෙන්නේ නැතිබව. හරියටම පෙර අත්බැව් තුල දිගින් දිගටම හේතු හදපු නිසා දැන් මේ විදියට විපාක ඵලයක් වෙලා ඉන්නවා වගේ. තවත් විදියකින් කියනවා නම් දැන් මේ ඉන්නේ පත්තු වෙමින් ගිනි ගෙන දැවෙන ජාතියක් පහල කරගෙනයි. මෙන්න මේ පත්තුවෙන්න ගිනිගන්න තියෙන හේතු ටික නැති කලාම මොකද වෙන්නේ? ගිනි ගන්න එක පත්තු වෙන එක නවතිනවා. ඒක අපි නිවීම කියලා හඳුන්වනවා. අර අපි එච්චරකල් පහල කරගෙන හිටිය ගිනි ගෙන දැවෙන ජාතියේ අවසානය හෙවත් මරණය සිද්ධ වෙනවා. 

මේ ගැන පොඩ්ඩක් කථා කරලා වටහාගන්නට උත්සාහ ගනිමුකෝ. මම පෙර ලිපියෙත් පෙන්වා දුන්න නොයෙක් නොයෙක් බවයන්ට පත්වෙන අපි කොහොමද නැවත ඒ ඒ හේතුවට අනුව අත්බැවයන් ලබන්නේ කියලා. තවත් ආකාරයකට කියනවා නම් නැවත ඉපදීම සිද්ධ වෙන්නේ කොහොමද කියලා පෙන්නලා දුන්නා. 

තිරිසන් බවට කැමැත්තෙන් බැඳුනොත් තිරිසන් සතෙක් වෙලා තිරිසන් අපාගත උපතක් ලැබෙනවා කියලා කිව්ව මතක ඇතිනේ නේද? අන්න ඒ වගේ සිද්ධීන් තමයි මේ බර වචනයකින් කියන්නේ “භව පච්චයා ජාති“ හෙවත් භව ප්‍රත්‍යයෙන් ජාති පහළවීම සිද්ධ වෙනවා කියලා. 

මෙහෙම හිතලා බලන්නකෝ. අපිට හිත හොඳටම දූෂ්‍ය වෙලා හොඳටම තරහාගියාම... ඒ කියන්නේ අර යක්ෂයා ඇවිස්සිලා ඉන්න වෙලාවක් කියලා හිතන්නකෝ. එතකොට අපි දීහා බලාගෙන ඉන්න අය මොකද කියන්නේ? “අපෝ මෙයාගේ හැටි විතරක් යකෙක් වගේ“ කියනවා නේද? ඒ අය කොහොමද අපිට “යකෙක් වගේ“ කියලා කිව්වේ. “යකෙක් වගේ“ කියන්නේ අපේ බාහිර රූපය බාහිරයට ඒ මොහොතේ දිස්වෙලා තියෙන්නේ යක්ෂ රූපයක් වගේ. ඒ කියන්නේ බාහිර කෙනෙකුට පේන්නම අපේ රූපය වෙනස් වෙලා තියෙනවා. එහෙම නේද?

මේ කියන්නේ දැඩි තරහක් නිසා දූෂ්‍ය වෙච්ච අපේ සිත ක්‍රියාත්මක වෙලා කියපු කරපු දේවල් තුලින් ගොඩනගපු එසේත් නැතිනම් උපද්දපු වෙනස්ම ආකාරයේ රූපයක් පිළිබඳවයි. තරහා බවට පත්වෙච්ච නිසා යක්ෂ ජාතියක් බාහිරයට විද්‍යාමාන වුණා කියලා කිව්වත් නිවැරදියි. 

තවත් වෙලාවක පරුෂ වචන කියමින් කෑගහන කොට බැනගන්නකොට කියනවා නේද බල්ලෙක් වගේ බුරන්නේ නැතිව ඉන්නවා කියලා. මේ වගේ ඒ ඒ අවස්ථාවට අනුව අපි මේ දේවල් කියන්නේ ඒ ඒ අවස්ථා වලදී අපි දකින රූපය අර කියන අත්බැවයන්ට සමානකමක් දක්වන නිසයි. 
දැන් හොඳින් හිතලා තේරුම්ගන්න උත්සාහ කල යුතුයි. යමකට ඇලෙන මොහොතක් පාසා යමකට ගැටෙන මොහොතක් පාසා අපි ඒ ඒ බවයට පත්වෙමින් ජාති පහල කරනවා. කෙටියෙන් කියනවා නම් මැරී මැරී ඉපදෙනවා කියලා කිව්වොත් හරි. 

මේ දේ සිද්ධ වෙන්නේ අපිට විතරක් නොවේ. අපි ඇලෙන සෑම සත්ව, පුද්ගල, ද්‍රව්‍ය, වස්තුවකම මේ ස්වභාවය තියෙනවා. ඒ විස්තරය තමයි මම අර ඉහතින් දැම්මේ බුදු හිමියන් විසින්ම පෙන්වා දී තියෙනවා ජාතිය ස්වභාවයක් කරගත්ත මේ අපි ජාතියක් ස්වභාවය කරගත්ත දේවල්ම සොයනවා කියලා. 

හිතලා බලන්න ඔබේ ගෙදර ඉන්න ඔබ ඇලීමෙන් ඉන්න ඔබේ පිරිස ගැන, සුරතල් සතුන් ගැන, ඔබ ඔය පාවිච්චි කරන පරිඝණකය නැතිනම් වෙනත් ඔබ ආශා කරන වස්තු ගැන. මේ සෑම දෙයක්ම මොහොතින් මොහොත නැවත නැවත ඉපදෙනවා. ඔබ ගෙදරට ගෙනාපු අලුත්ම පරිඝණකය නෙවේ දැන් ඔබ ලඟ තියෙන්නේ. ඒකේ වර්ණය වෙනස් වෙලා ක්‍රියාකාරිත්වය වෙනස් වෙලා අලුත් බව නැතිව ගිහින් වෙනත්ම වර්ගයක පරිඝණයක් වෙලා තියෙනවා. ඔබ දන්නේවත් නැතිව ඔබටත් හොරා ඔබේ පරිඝණකය දැන් වෙනස්ම කෙනෙක් විදියට උපත ලබලා. ඒත් ඔබ සිතාගෙන ඉන්නවා ඔය තියන්නේ මෙච්චර කාලයකට කලින් ගත්ත පරිඝණකයනේ කියලා. දැන් ඒ සිතිවිල්ල නිසාම ඔබ ඇලෙනවා ගැටෙනවා කම්පා වෙනවා. 

පරිඝණකයකට ඇලීමක් ඇතිකරගත්ත ජාතියේ කෙනෙක් බවට ඔබ පත්වෙච්ච නිසා තමයි ඔබට ඔය සියලුම ගැටීම් කම්පා වීම් දුක්කරදර රැසක් එන්නේ.  මේ අනුව ඔබ මොහොතින් මොහොත පත්වෙන ජාති හිතලා බලන්නකෝ. 

කෑමකට ඇලෙන කොට - කෑමකට ඇලිච්ච ජාතියේ කෙනෙක් වෙනවා. තවත් ආකාරයකට කියනවා නම් කෑමකට ඇලිච්ච මම පහල වෙනවා.  වෙනත් පුද්ගල රූපයකට ඇලුනොත් - උදාහරණයක් විදියට “මගේ අම්මා“ කියලා කාන්තා රූපයකට ඇලීමක් ඇතිකරගන්න ජාතියට පත්වෙනවා කියලා කියන්නේ මොකක්ද? දරුවා කියන ජාතිය පහල වීමක් තමයි එතැන සිද්ධ වෙලා තියෙන්නේ. හොඳ දරුවෙක් නරක දරුවෙක් විදියට නොයෙක් ජාතියේ වර්ග කිරීම් ඒ ඒ පුද්ගලයාගේ කරන කියන දේ අනුව බාහිරයට දිස්වෙන ආකාරයට එය ඇසුරු කරන තවත් අය සිද්ධ කරනවා.  

අවුල තියෙන්නේ බාහිරයට රූපය දිස්වීම නෙවේ. තමන් තුල ඇතිවන ක්‍රියාකාරිත්වය මතයි. ඒ කියන්නේ ධර්මාවබෝධයට පත්වෙච්ච කෙනෙකුත් ඒ කියන්නේ මේ හේතු ඵල දහම පිළිබඳව හොඳ අවබෝධයක් තියෙන කෙනෙකුත් යුතුකම් දන්න හොඳ දරුවෙක් කියලා බාහිර ලෝකය හඳුනාගනීවි. ඒත් ඒ පුද්ගලයා ඒ යුතුකම කරන්නේ ඇලීමකින් තොරව නම් ඒ කියන්නේ කැමැත්තෙන් බැඳී හෝ අකමැත්තෙන් ගැටී නොවේ නම් එයාට පැවැත්මට හේතුවෙන ආකාරයේ වැඩපිලිවෙලක් එතැන ක්‍රියාත්මක වෙන්නේ නෑ. තවත් ආකාරයකින් කියනවා නම් ඒ පුද්ගලයා ඇත්තටම තමන්ගේ සිත තුල දරුවා කියන ජාතිය පහල වෙච්ච ඒ හැඟීමෙන් ඇලීමෙන් බැඳීමෙන් ගැටීමෙන් කටයුතු කරන කෙනෙක් නෙවේ. 
අන්න ඒ නිසා තමයි බාහිරයට තමන් කොහොම පෙනුනත් බාහිර ලෝකය තමන්ව මොන ආකාරයකට වර්ග කලත් තමන්ගේ නිවී සැනසීමට අදාල වෙන්නේ තමන් විසින් තමන්ව තේරුම්ගන්න තරමටයි. 

ඔබ කිසිවෙකුත් නොවන විට තවත් බොහෝ අයට පමණක් නොවේ ඔබටත් ඔබෙන් යහපත සිද්ධ වේවි. 
තමන් ගැන සැලකිල්ලෙන් සිහියෙන් ඉන්නකොට පුළුවන් කමක් ලැබෙනවා තමන් මේ පත්වෙන ජාති ගැන අවබෝධයක් ලබන්නට... මම කියලා පැවැතගෙන එන කෙනෙක්වත් මම කියලා අනාගතයට යන කෙනෙක්වත් ලෙසින් සංඥා ගන්නේ නැතිව මම කියන මේ හේතු ඵල දහමට අනුව සිද්ධ වෙන තවත් එක් අවස්ථා සමූහයක් විතරයි කියලා වටහාගන්නට හැකිවෙනවා. මේ අවබෝධය පූර්ණයට පත්වීම නිවීම ලෙසින් හඳුන්වනවා. 

ජාතිය කුමක්ද කියලා අවබෝධ කරගන්න මොහොතේම ජාතිය පහළවිමට හේතුවත් එය නිරෝධයත් එය නිරෝධ කරන ක්‍රමයත් තමන්ට අවබෝධවෙනවා. චතුරාර්ය සත්‍ය ජාතිය තුලින් දැකීම තමයි ඒ සිද්ධ වෙන්නේ. සිත, කය, වචනය ජාති නිරෝධ කිරීම පිණිස යොදාගන්න ජාතිය බාහිරයට දිස්වෙන්නේ බාහිර අය හඳුනාගන්නේ භික්ෂු භික්ෂුණී උපාසක උපාසිකා කියලායි. ඉතින් මේ ආර්ය ජාතියේ අයව බාහිර අයට හඳුනාගන්නට නොහැකි වෙන්නටත් හැකියි කියලා සිහි තබාගෙන මේ හේතු ඵල දහමේ අවසන් ලිපියට සම්බන්ධ වන්න ඔබටත් හැකියි. ඒ කියන්නේ ජාතියක් පහල වුණා නම් ජරාවට පත්වෙලා මරණයට පත්වෙන්නට සිද්ධ වෙන්නේ කොහොමද කියලා තෝරගන්න හෙවත් 12වන අංගය පැහැදිලි කරගන්නට යොමුවිය හැකියි. 
සියලු ලෝක සියලු සත්වයෝ නිවී සැනසෙත්වා!!!

1 comment:

liyanage said...

ඔබතූමියගේ පටිච්ච සමුප්පාදය පැහැදිලි කිරීම මනාව වටහා ගත්තෙමි දහම වැටහුනද එය ප්‍රායෝගිකව ක්‍රියාත්මක කිරීමට යාමේදී මතුවන ගැටලු ඔබතුමිය හමුවේ නිරාකරණය කරගැනීමට හැකිවේනම් එය මහත් අස්වැසිල්ලක් වනු ඇත ඔබතුමියට
ආර්ය මාර්ගය පූර්ණ කරගැනීමට ශක්තිය ධෛර්යය ලැබේවා! තෙරැවන් සරණයි