Follow by Email

නිර්වාණ ධර්ම බ්ලොග් අවකාශය | Nirvana Dhamma BLOG

About this Blog | මෙම බ්ලොග් අඩවිය ගැන...

"මෙය “නිර්වාණ ධර්ම“ වෙබ් අඩවියට සමගාමීව ඔබ වෙත ලබාදෙන බ්ලොග් අඩවියයි! මෙසේ අවස්ථාවන් රැසක් තුලින් සත්ධර්මය කැටිකොට ලබාදෙන්නේ අතිශයින්ම බුද්ධිමත් සැබෑම මිනිසුන් වෙත පමණයි! ඔබේ ආගම ජාතිය කුලය තත්ව තානාන්තරය කුමක් වුවත් සැබෑම මිනිසෙක් ලෙසින් ප්‍රයෝජනයට ගෙන යහපත, සැබෑ සතුට, සැනසීම උදාකරගැනීම පිණිස “නිර්වාණ ධර්ම“ වෙතින් වෙන් වන අවකාශයයි!“
"This is the BLOG of "Nirvana Dhamma" web site which is Strictly for Human beings only! No matter what your status in this world is, No matter what you believes on, No matter what your religion is, Only matter is that whether you are a human being or not to gain the maximum benefits through all these efforts!"

Monday, July 20, 2015

මේ කරන කියන දේ සුදුසුයි ද? හිතෙන් අහලා බලන්න!!!

මෙවර සටහන මුල් වෙන්නේ අත්දැකීමක් මුල්කරගෙනයි. මේ පිළිබඳව තම තමන්ගේ ජීවිත වලින් දැකීමත් දැක ඒ දේ උදෙසා නිසි ක්‍රියාමාර්ගයක් ගැනීමට වීර්යය කිරීමත් ඔබගේ නැණවත්භාවයයි!

ඔබ ඉතාමත් කාර්ය බහුලයි. දරුවන් වෙනුවෙන් හෝ දෙමව්පියන් වෙනුවෙන් හෝ සහකරු සහකාරිය වෙනුවෙන් හෝ මුණුබුරු මිණිබිරියන් වෙනුවෙන් හෝ කැපවී සිටින ඔබට ඔබගැනවත් බලාගන්නට වෙලාවක් නැතිබවමනේ ඔබ පවසන්නේ නේද? හිතන්න ඔබට දරුණු රෝගාබාධයක් හැදෙනවා. ඒ රෝගාබාධය සුවකරගන්නට ඔබ ඉතාමත් උනන්දුවෙන් උත්සාහවන්ත වෙනවා එහෙම නේද?

උදාහරණයකට කොලොස්ටරෝල් වැනි තත්වයන් මඟ හරවා ගන්නට හෘද ආබාධයන් වැනි තත්වයන් මඟ හරවාගන්නට ඔබ දුවන්නේ නැතිද? ව්‍යායාම වශයෙන් දුවනවා... වෛද්‍යවරුන් පසුපස දුවනවා... අදාල කෑම බීම පසුපස දුවනවා... බෙහෙත් වර්ග පසුපස දුවනවා... බෙහෙත් ක්‍රම පසුපස දුවනවා... ඒවාට සම්බන්ධ ලිපි ලේඛන පොත පත කියවා ඒවා ගැන දැනුවත් වෙන්නට දුවනවා... ඔය හැමදේම වෙනුවෙන් මුදල් එක්රැස් කරමින් වැය කරමින් දුවනවා... ආතතිය නැති කරගන්නට භාවනා කරන්නට පවා දුවනවානේ නේද? ඉතින් මේ ආකාරයෙන් කොතරම් දුවනවාද නේද?

කොතරම් දිව්වත් ඔබට මේ රෝගබාධයෙන් මිදීමක් නැති බව ඔබට දැනගන්නට ලැබෙනවා. ඔබ දැන් මියයන්නට ලඟ බව දැනගන්නට ලැබෙනවා. එවන් වූ මොහොතක ප්‍රවීණ වෛද්‍යවරයෙක් ඔබට පවසනවා "හරි මම මේ දරුණු රෝගාබාධය සුවකරදෙන්නම්... හැබැයි ඔබ ඔය කාර්යබහුල වැඩපිළිවෙලින් මාසයකට පමණ ඉවත් වෙලා වනගත වෙලා මම කියන ගස් වල පොතු වර්ග මල් වර්ග ඵල ආදිය කමින් මම කියන ආකාරයෙන් ජීවත් වෙන්නට ඔබට සිද්ධ වෙනවා... කැමති නම් මට පුළුවන් අනිවාර්යෙන්ම ඔබව සුව කරන්නට..."

ඔබ කැමති වෙන්නේ නැතිද? රැකියාවෙන් නිවාඩුවක් හෝ ගෙන මේ තත්වයට පත්වෙන්නට කැමති වෙන්නේ නැතිද? දරුවන්ගේ, දෙමව්පියන්ගේ, මුණුබුරු මිණිබිරියන්ගේ, සහකාර කාරියන්ගේ, රැකියාමය හෝ වෙනත් ඕනෑම වැඩකටයුත්තක් නවතා දමා මේ ප්‍රතිකර්මය කරගන්නට ඔබ යම් යම් උපක්‍රම සකසා ගන්නේම නැතිද?

ඇයි සමහර වෙලාවට ඔබට දරුණු රෝගයකදී ඔය මාස ගණන් වෙද ගෙවල් වල එහෙම නතර වෙලා ඉන්නවා නේද? වෛද්‍යවරයා කියන්නාවූ කෑම වට්ටෝරුව කොතරම් නීරස වුවත් අපහසුවෙන් වුවත් කනවා නේද? නිවාඩු දමාගෙන පැය ගණන් පෝලිම් වල රස්තියාදු වෙලා වෛද්‍යවරුන් හමුවෙලා වෛද්‍ය සායන වලට සම්බන්ධ වෙලා පැය ගණන් නොකා නොබී ලේ වල තත්වය දැනගන්නට ඕන නිසා බොහෝම වීර්යයකින් යුතුව කටයුතු යොදනවා නේද? වෙදකම් කරන තැන් වලට මහා පාන්දර ගිහින් නිදිවරාගෙන බංකු ලෑල්ලක් මත හෝ හිඳගෙන අඟුපිලක හෝ ලැගගෙන පෝලිමේ ඉන්නවා නේද? කොතරම් මුදල් ප්‍රමාණයක් වුවත් වියදම් කරනවා නේද? කොතරම් අපහසු වුවත් කාලය කෙසේ හෝ සොයාගෙන ව්‍යායාම් ආදිය කරනවා නේද? කොතරම් අපහසු වුවත් යාන වාහන සපයාගෙන හෝ වේවා පොදු වාහන සේවයේ හෝ ගමන් කරනවා නේද? වෛද්‍යවරයන් කියන දේ ඇස් පියාගෙන වුවත් විශ්වාස කරන තරමේ විශ්වාසයක් ඔවුන්ව ඇදහීමක් ඔබට තියෙනවා නේද? තණ කොළ වර්ගයක් වුවත් තමන්ගේ රෝගය සුවවෙනවා කිව්වොත් ආහාරයට ගන්නා තරමටම ඔබ අසරණ වෙනවා නේද?

අනේ, මේ දේවල් කලේම මරණය මොහොතකට කල් දමාගන්නට පමණක්ම මිස මරණයෙන් සඳහටම මිදෙන්නට නම් නොවන බව ඔබට මොහොතකටවත් සිහිපත්වුනේම නැතිද?

සඳහටම මරණයෙන් මිදෙන්නට සඳහටම සියලුම ආකාරයේ රෝගයන්ගෙන් මිදෙන්නට මේ ජීවිත කාලයේදීම අවශ්‍ය කරන්නාවූ නිවන් මාර්ගය පාදා දෙනවා යැයි පවසන හිමිනමක් හමුවී ඒ මාර්ගය පාදාගන්නට සිතක්වත් පහල නොවන ඔබට ඒ වෙනුවෙන් කාලය සපයාගන්නට ඉතාමත් අපහසු ඔබට ඒ වෙනුවෙන් කැපවෙන්නට අලසකමක් දැනෙන ඔබට... අනේ, ඒ හිමිනමම ඔබගේ නොයෙක් නොයෙක් රෝගී තත්වයන් සුවපත් කරගැනීමට බෙහෙත් කරනවා කිව්වොත්? බෙහෙත් කරගන්නා මාර්ගයක් පාදා දෙනවා කිව්වොත්? භාවනා බලයෙන් ඔබව සුවපත් කරනවා කිව්වොත්? මට ඔබගේ පිළිතුර අනවශ්‍යයයි! ඔබ ඔබටම පිළිතුරු දෙන්න!

අනේ, අති දුර්ලභ මිනිස් ජීවිතයක් ලබා ඇති ඔබට ඔය මිනිස් ජීවිතය පාවිච්චි කරලා කරන්නට තියෙන්නේ ඔය හෙම්බත්වීම පමණක්මද? ඔයටික කරන තත්වයද ඔබ මනසින් උසස් වූ හෙයින් මනුස්සයෙක්! යැයි පුරසාරම් දොඩනා උසස් මානසිකත්වය?

ඔබ ඔතරම් කාලයක් වෙහෙස වෙලා දුවලා දුවලා රෝගය සුවකරගත්තා කියමුකෝ... මරණය කල්දමාගත්තායැයි සිතමුකෝ... දැන් ඔබට ඇත්තටම මරණය කල්ගියාද? රෝගය සුවවෙලා ගෙදරට එන ඔබ වාහනයකට හැපුනොත්? සතෙක් සර්පයෙක් කෑවොත්? රෝහලම හෝ වෙද ගෙදරම ඔබගේ හිසට කඩාගෙන වැටුනොත්? මැරෙන්න කොතරම් ආකාර තියෙනවද? ඔබ ඔය හැමදෙයකින්ම බේරී ප්‍රායෝගිකව මරණය කල් දමාගන්නේ කොහොමද?

"ආ මේක හරි වැඩක්නේ... අපි බෙහෙත් ගත්තාම මෙයාට තියෙන අමාරුව මොකක්ද? එයා බේත් බොන්නේ නෑ වගේ හරියට අපිට බණ කියන්න එන්නේ... නිවන් මඟ වඩන්නත් නිරෝගීව ඉන්න එපැයි! නිවන් දකිනවා කියලා බේත් නොකර ඉන්න බෑනේ! බුදු හාමුදුරුවොත් බෙහෙත් කරගත්තා අනෙක් අයට බෙහෙත් කරගන්න ක්‍රම කියලා දුන්නා... බෙහෙත් කරගන්න එපා කියනවා නම් එයා බණ දන්න කෙනෙක් නෙවේ... මේ ගන්නා බෙහෙත් ටික සුවසේ නිවන් මාර්ගය පූර්ණය කරගැනීම පිණිස හේතු වාසනා වේවා කියලා තමයි මම මේ කැපවීම කරන්නේ... ඒකේ වරදක් නෑනේ!... මේ ආකාරයට ඉතින් ලියනවා නම් ලියන්නට පිටු දහස් ගණනක සාධාරණීකරණය පිණිස දක්වන්නාවූ හේතු තියෙනවා. එහෙම නේද? මේ වෙලාවේ ඔබගේ හිතට පැමිණියාවූ සාධාරණීකරණ හේතුවත් මේ ලැයිස්තුවේ නැතිනම් එය එකතු කරගන්න!

ඔව්! බුදු හිමියන් බෙහෙත් ගැනීම අනුමත කලා තමයි. සියලු රෝගයන්ට නියම ප්‍රතිකර්මය වන ගව මුත්‍රා වල බහා තැබූ අරළු බෙහෙත් වශයෙන් පානය කරන්නට හැකි නම් මහණ දම් පුරන්නට එන්න කිව්වා. ඒ කියන්නේ සම්මතයේ විවිධාකාරයේ බෙහෙතක් සපුරාගන්නට නොහැකි අවස්ථාවක පහසුවෙන් සපුරාගන්නට හැකි සාර්ථක බොහෝම මූලික මට්ටමේ ඖෂධයක් තමයි ඒ පෙන්වා දුන්නේ.

බුදු හිමියන් ඒ බෙහෙත අනුමත කලේ ඊට වඩා වැඩි බෙහෙතක් සපයාගන්නට කැපවී සිටින කෙනෙකුටයි. ලෞකික වැඩපිලිවෙල තුල පැවදි වෙසින් හෝ වේවා ගිහි වේශයෙන් හෝ වේවා ගිහියෙක්වී කියන කරන සිතන කටයුතු 99%ක්ම තිබියදී ඒ වෙනුවෙන් වීර්ය කරමින් කැපවී කාම මඩේ ලැග ගෙන සිටිමින් 1%ක් තමන්වම රවටා ගැනීම පිණිස නිවන් මාර්ගය පිණිස කටයුතු කරන පිරිස වෙතට මේ සාධාරණීකරණය කරමින් හේතු දක්වන්නට පෙර සිතන්නට නම් බොහෝ දෑ තිබෙනවා.

මරණය මොහොතකට කල්දමාගන්නට ඔතරම් උත්සාහයක් ගෙන හතිදමාගෙන දුවනා ඔබ, සඳහටම මරණයෙන් මිදෙන්නට හැකි, සඳහටම සියලුම ආකාරයේ රෝගයන්ගෙන් මිදෙන්නට හැකි, මේ ජීවිත කාලයේදීම ඒ ප්‍රථිඵලයන් අත්දැකිය හැකි ඒ නිවන් මාර්ගය පූර්ණය කරගන්නට කැපවීම වීර්යය පළමුකොට තබා සිටින්නෙක්ද? 99%ක් කෙසේ වෙතත් 50%ක්වත් නිවීම පිණිසත් ලෞකික කටයුතු සාර්ථක කරගැනීම පිණිස කරගෙන යන්නාවූ කටයුතු සඳහා 50%ක් හෝ ලෙසින්වත් වෙන්කරගෙන සිටින්නෙක්ද? ඔබගෙන්ම අසන්න! කාටවත් උත්තර දෙන්නට අවශ්‍ය නෑ ඔබ ඔබටම අවංක වෙලා පිළිතුරක් ලබාදෙන්න!

අනේ, ඔබ ඇත්තටම කොතරම් මෝඩකමකින් අසරණ වෙලා ඉන්නවාදැයි ඔබටම දැනේවි! එහෙම දැනුනට කමක් නෑ... ඇයි? ඔබ ඔබගේම මෝඩකම් වලට ලජ්ජා නොවුනොත් ඔබගේම අසරණභාවය බිය නොවුනොත් ඔබ ඔය හෙම්බත් වූ දිවිල්ල හැමදාම කරනවා නියතයි!!!

කණ්ණාඩිය ඉදිරිපිටදී හැඩ වැඩ බලන ඔබ මොහොතකට ඒ මානසිකත්වයෙන් මිදී බලන්න ඔබගේ මුහුණු දිහා... ඔබ කොතරම් වෙහෙසකින් දුකකින් හෙම්බත්භාවයෙන් සිටිනවාදැයි ඔබටම දැකගන්නට හැකිවේවි!!! ඔබ ඇත්තටම කොතරම් අසරණද? ඔබට ඔබ ගැන සතුටු විය හැකිද? අනන්ත සසරක් කෙටි වී ඇති බව දැනගෙන දැකගෙන අවංකවම සතුටු වෙන්නට තරම් හැකියාවක් ඔබට තියෙනවාද? අනේ, එහෙනම් දැන්වත් තීරණයක් ගන්නට වෙහෙසුනොත් නේද හොඳ???

"ආ... අපි නම් ඉන්නේ නිවන් මඟේ... අපි නම් හරියට පින්කරනවා... අපි නම් හරියට බණ අහනවා... මම නම් වැඩිපුර ඉන්නේ පන්සලේ... මම නම් මොනවා තිබුණත් පෝයට සිල් ගන්නවා... මම නම් කොහොම හරි ඒ භාවනා වැඩසටහනට සම්බන්ධ වෙනවා... ඒ ආරණ්‍යය නම් නියමයි... අපෝ අර හාමුදුරුවෝ නම් මෙහෙමයි... ඒ තැන නම් අන්තිමයි... අයියෝ ඒ අය වඩන නිවන් මඟක් නෑ... අර හාමුදුරුවෝ මෙහෙම කරනවානේ... අපිට නම් සිවුරු විතරයි අඩු... ඔය හාමුදුරුවෝ සිවුරුට සුදුසු නෑ... ඔයිට වඩා හොඳට මම දර්මය දන්නවා... ආමිසයටමයි ඔය හාමුදුරුගොල්ලේ බර... ආ ඒ අය බණ කියන්නේ ලාභ, කීර්ති, ප්‍රශංසා වලටනේ... ඔය මොන බණද... ඕවත් බණද..." මේ ආදී වශයෙන් අනන්ත දුක් රැස ආරම්භ වේ!! කියලා තමයි ඉතින් කියන්න වෙන්නේ...

ලෞකික ජීවිතයේ නොයෙක් නොයෙක් කටයුතු සාධාරණීකරණය කරගන්නට හේතු දක්වන ඔබ බොහෝ විට කථාවක් වුවත් පටන්ගන්නේ නම් නිවන අත ලඟ වගේ නේද?... එහෙත් අවසාන වෙන්නේ ශාසනයටම ගරහාමයි... ශාසනික වශයෙන් කැපවී සිටිනන් විවේඡනය කරලාමයි... තවමත් ලෙඩ දුකක් ලැබෙන විට කම්පාවෙන ඔබ, ලෙඩ දුක් සුවකරනවා කීවොත් හාමුදුරු කෙනෙකුවුවත් සොයාගෙන දුවන්නාවූ ඔබ මේ කරන දේ සුදුසුයිද?

රෝගයකට බෙහෙත් කරගන්න එයට ධර්මයෙන් බාධාවක් නෑ. එහෙත් ධර්මය තුලින්ම එහි සීමාව දැකගන්න... ඒ රෝගයන්ගෙන් සඳහටම මිදෙන මාර්ගය වෙනුවෙන් ඒ තාවකාලික වැඩපිලිවෙල අඩුකරගැනීම තුලින් ඉතිරිවන කාලය යොදවන්න... ඔබටම ඒ නීරෝගී සුවයෙන් ලැබෙන මානසික සැනසීම දැකගන්නට හැකිවේවි!!! "ආරෝග්‍යා පරමා ලාභා - නීරෝගීබවම උතුම් ලාභයයි" මේ කිව්වේ මේ භයානක සංසාර පැවැත්ම නමැති භව රෝගයෙන් නීරෝගී බවටම පත්වීම උතුම් ලාභය හෙවත් නිවීම ලැබීමයි යන්නම මිස තාවකාලිකව ඔබ රෝග සමූහයකින් සුවයක් ලබා ලබන්නාවූ ලාභයක් ගැන නොවන බව අන්න එවිට ඔබට ඔබගේම ප්‍රඥාවෙන් අත්දැකගන්නට හැකිවේවි!!! සියලු සත නිරෝගී වෙත්වා!!! තෙරුවන් සරණින් නිවනින්ම සුවපත්වෙත්වා!!!

No comments: