නිර්වාණ ධර්ම බ්ලොග් අවකාශය | Nirvana Dhamma BLOG

About this Blog | මෙම බ්ලොග් අඩවිය ගැන...

"මෙය “නිර්වාණ ධර්ම“ වෙබ් අඩවියට සමගාමීව ඔබ වෙත ලබාදෙන බ්ලොග් අඩවියයි! මෙසේ අවස්ථාවන් රැසක් තුලින් සත්ධර්මය කැටිකොට ලබාදෙන්නේ අතිශයින්ම බුද්ධිමත් සැබෑම මිනිසුන් වෙත පමණයි! ඔබේ ආගම ජාතිය කුලය තත්ව තානාන්තරය කුමක් වුවත් සැබෑම මිනිසෙක් ලෙසින් ප්‍රයෝජනයට ගෙන යහපත, සැබෑ සතුට, සැනසීම උදාකරගැනීම පිණිස “නිර්වාණ ධර්ම“ වෙතින් වෙන් වන අවකාශයයි!“
"This is the BLOG of "Nirvana Dhamma" web site which is Strictly for Human beings only! No matter what your status in this world is, No matter what you believes on, No matter what your religion is, Only matter is that whether you are a human being or not to gain the maximum benefits through all these efforts!"

Thursday, August 2, 2018

බැලූ බැල්මට යහපත් වගේ පෙනෙන අදහස් වල ඇති නොපෙනෙන අනතුර!

ගෙදර කව්රුවත් නැතිව තනිවූ වෙලාවක... ඒ තනිවූ කෙනා ගෙදරින් එළියට ගිහින් හයියෙන් කෑ ගහනවා “අනේ! මම ගෙදර තනියම, මම ගෙදර තනියම... මගේ අම්මා, තාත්තා, මගේ සහෝදරයෝ, යාළුවෝ ආදී රැකවරණයට අවශ්‍ය පිරිස ඉක්මනට ඒවා...” කියලා... ඒ විතරක් නෙවේ තෑගි බෝගත් ගොඩක් අතේ තියාගෙන තමයි මේ විදියට කෑ ගහන්නේ... 

මේ වගේ අවස්ථාවක කව්රු කලින් එයි කියලද හිතන්නේ?

බලාපොරොත්තු වෙන රැකවරණය දෙන පිරිස ඒවිද? නැතිනම් තියෙන රැකවරණයත් නැති කරලා මරණය හෝ මරණයට සමාන දුකට පත් කරන්නට හැකි සොරුන් මංකොල්ලකාරයන් ආදී පිරිස ඒවිද?

ගෙදර රැකවරණයට අවශ්‍ය පමණින් පිරිසක් නැතිනම් විය යුත්තේ අදාල නැති පිරිසට ඒ බව නොහඟවා තනිවම ආරක්ෂා වීමට හැකි ක්‍රමයන් අනුගමනය කිරීමයි. විශේෂයෙන්ම ගෙදරින් එළියට යනකොට අම්මා තාත්තා කියන්නේ දොර වහගෙන ඇතුලට වෙලා පරිස්සමෙන් ඉන්න අපි එනකම් කියලනේ. අන්න ඒ වගේ...

මේ ඉතින් සිද්ධිය පැහැදිලි කරන්න යොදාගත්ත පුංචි උපමා කතාවක්...

මේ ශාසනයේ ශ්‍රාවක දරුවන්ට රැකවරණය දෙන අමා මෑණියන්වහන්සේ, බුදු පියාණන්වහන්සේ සම්බුදු ඔවදනක් දුන්නා. "දරුවනේ පියාගේ භූමියේ (සතර සතිපට්ඨානය) ඉන්න" කියලා. මේ පියාගේ භූමියෙන් ඉවත් වෙලා “ඉක්මනට රැකවරණය සලසන්නට හැකි, ශාසනයට බලයක් දෙන්නට හැකි පිරිසක් වන රහතන්වහන්සේලා හෝ මග ඵල ලාභීන් ලක්ෂ ගණින් බිහිවේවා” කියලා අදහස් ගන්න විට අනතුර එසේ මෙසේ එකක් නෙවේ... 

ඇත්ත, බැලූ බැල්මට වරදක් නෑ තමයි.  අවංක පැතුමක්.  වුණා නම් ඉතාමත් යහපතක් ගෙන දෙන පැතුමක්.  බැලූ බැල්මට නම් මෙහි සොයාගන්නට වරදක් අඩුපාඩුවක් නෑම තමයි.  එහෙත්, මේ වගේ පැතුම් තුල තිබෙන නොපෙනන, නොදැනෙන අනතුර තමයි ඉහත උපමා කතාවක් තුලින් පැහැදිලි කරන්නට උත්සාහ කලේ.  

ශාසනය සත්පුරුෂයන්ගෙන් අඩු මග ඵල ලාභීන්ගෙන් අඩු දුර්වල එකක් බවට පත්වීගෙන එනවාය කියන පණිවිඩය තමයි නිවන් මඟට බාධා කරන්නාවූ මාර පාර්ශ්වික පිරිසත්, අසුර ආදී නොපෙනෙන මහා පිරිසක් අදහස් ගන්නේ. ඒ අය නිකන් ඉන්නෙත් නෑ... බාධා කරන්නේ නිවන් මඟ වඩන පිරිසටමයි. පියාගේ භූමියෙන් මොහොතකට හෝ පිටතට ගියහොත් අනතුර එසේ මෙසේ එකක් නෙවේ. 

ඉතින්, ශ්‍රද්ධාව විරිය සතිය සමාධිය ප්‍රඥාව කියන්නාවූ ඉන්ද්‍රිය බලයන් නැගෙන ආකාරයෙන් මේ උතුම් පින්කම් සිදුනොකලහොත් එයින් සිදුවන අයහපත බැලූ බැල්මට හඳුනාගත හැකි එකක් නෙවේ. ඒ නිසාම තමයි උපමා කතාවක් කියලා අදහස වටහාගන්නට පහසුවන ආකාරයෙන් විග්‍රහ කලේ.

මේ වගේ මහා පින්කම් කරන්න කොතරම් කැපවෙනවද? ඉතාමත් උතුම්... සැබැවින්ම සහාය දිය යුතුමයි! අගය කල යුතුමයි!  බොහෝ පිරිසකට මහා පුණ්‍ය ගංගාවක්මයි!  

එහෙත්, මේ දේවල් ප්‍රඥාවන්තව කරගන්නට දක්ෂ වෙන්න ඕන. නැතිනම් අනතුරත් මහා පරිමාණයෙන්මයි. උතුම් සම්බුදු ගුණයන්ට පැහැදී, උතුම් සත්ධර්මයේ ගුණයන්ට පැහැදී, උතුම් ආර්ය මහා සංඝ රත්නයේ ගුණයන්ට පැහැදී, තම තමන්ට අංශු මාත්‍ර තරමින් හෝ නිවීමක්, නිවෙන මඟක් ලබාදුන් ඒ උතුම් තෙරුවණට කෘතෝපහාරයක් වශයෙන් මේ පින්කම් සිදුකරගන්න. කෘතෝපහාරයන් කරන විට ශ්‍රද්ධා විරිය සති සමාධි ප්‍රඥා බලයන්, ඉන්ද්‍රියන් නැගෙන්නේ ඒවායේ විපාකයන් පවා අවබෝධයෙන් කරන විටදීයි. 

ඉතින්, ඔන්න යුතුකමක් ඉටු කලා... මහා පින්කමක් අඩුපාඩුවක් නැතිව, අනතුරක් නැතිව කරගන්නට මට වැටහෙන ආකාරයකින් මඟ පෙන්වීමක් සිදුකලා.  ගිය වරත් හැකි උපරිමයෙන් මේ කාරණය පෙන්වා දෙන්නට උත්සාහ කලා. එහෙත් මම හිතන්නේ කියන දේ නාහන හිතුවක්කාරයින් බහුල නිසාත් කාරණය ගැඹුරු නිසාත්, පණිවිඩය නිසි සේ නොගිය නිසාත් ආදී හේතු රැසක් මුල් වී පණිවිඩය මඟ හැරී ගියා.  

රැකවරණයක් නැතැයි කියමින් කෑමොර දී, රැකවරණය පිණිස ශක්තිමත් වීම පිණිස බලාපොරොත්තු ඇතිව පැතුම් පතා, පෙනෙන නොපෙනෙන බොහෝ අනවශ්‍ය පිරිසකගේ අවධානය ලබාගෙන අනේ අපිට බාධා සිද්ධ වෙනවා කිව්වාට ඵලක් නෑ. හේතු සකස් කරමින් ඵල නිරෝධ කල නොහැකියි. 

මේ වගේ කැපවීමෙන් අලංකාරවත්ව කරන්නාවූ මේ උතුම් පින්කම්, 
කෘතෝපහාරයක් වශයෙන්ම තෙරුවණ උදෙසා එකින් එක සැදැහැ සිතින් තුන්සිත පහදවා පූජා කොට තම තමන් කරගත්තා සේ චිත්ත ප්‍රසාදයට පත්ව තෙරුවණේ සැබෑ රැකවරණයේ අපූර්වත්වයම විඳගනිත්වා! පෙනෙන නොපෙනෙන සියලු සතට අන්න ඒ අතහැරීමෙන් බලාපොරොත්තු රහිතව දෙන මහා පුණ්‍යකුසල ශක්තීන් අනුමෝදන් වෙත්වා! මේ ගැඹුරු කාරණය තම තම නැණ පමණින් පැහැදිලි කරගෙන නිවී සැනසෙන්නට කටයුතු කරත්වා!

ලක්ෂ ගණින් සීමාවක් පණවා නොව,  තුන් කල් වැඩ වසන අනන්ත සම්මා සම්බුදු පියවරුන්ට, පසේ බුදු පියවරුන්ට, මහරහතන්වහන්සේලා ප්‍රමුඛ කරගත් ආර්ය මහා සංඝරත්නය උදෙසාම, මේ පින්කම කරන්නට සිත් පහදවාගත් තැන් පටන්ගෙන ඒ වෙනුවෙන් කියන, කරන, හිතන සියලු දේ කෘතෝපහාරයක්ම වේවා! එසේ කරගන්නට නුවණැති සියල්ලෝ දක්ෂ වෙත්වා!

ඒ උතුම් තෙරුවණටම පූජා කරමි! පූජාම වේවා! කියන අදහස ඇතිව කරගන්නට දක්ෂවෙන්නට මෙයට සිතිවිලි මාත්‍රයකින්, ක්‍රියා මාත්‍රයකින්, වචන මාත්‍රයකින් පවා සම්බන්ධ වන සෑම පිරිසකටම හැකිවෙත්වා!

සෑම නිවසකම තෙරුවණ උදෙසාම පහනක් දල්වා කෘතෝපහාරයන්ම කරන්නට සිහි නුවණම ලැබේවා. අනවශ්‍ය අනතුරු ආකර්ශණය කර නොගැනීමට සිහියෙන් නුවණින් විරියෙන් යුතුව කටයුතු කරගනිත්වා!

අනතුරක්, අඩුපාඩුවක් හේතු ඇතිව පෙන්වා දෙන විට තමන්ට නොවැටහෙන නිසා හෝ පංච ඉන්ද්‍රියන්ට ගෝචර නොවන නිසා හෝ් අප්‍රසාද සිත් ඇති කර නොගනිත්වා!!!

පැහැදුනුවන්ගේ වඩ වඩාත් පැහැදීම පිණිසත්, නොපැහැදුනුවන්ගේ වඩාත් පැහැදීම පිණිසත්, පෙනෙන නොපෙනෙන වශයෙන් සම්බන්ධ වන සියලු සතගේ යහපත්වූ චිත්ත ප්‍රසාදය පිණිසත් හේතු උපකාර වෙත්වා!

Friday, July 6, 2018

නිවන් ලැබුමට... නිවන් මඟ වූ, සමාධි භාවනාව දන්නවද?


නිවන් මඟ සතර දැහැන් ලෙසත්, නිවීම යනු සතර දැහැනත් ලෙසින් මෙකල ප්‍රකට ප්‍රකාශනයක් පිළිබඳව ඉතාමත් මතුපිටින් යම් කාරණයක් පෙන්වා දීමට මේ සටහන තුලින් උත්සාහ කරන්නම්.  
අංගුත්තර නිකාය 2 - රොහිතස්ස වග්ගයේ - සමාධි භාවනා සූත්‍රය පිටුව 88 (පීඩීෆ් පිටුව 109)
මේ සූත්‍ර දේශනාව තුලින් "සමාධි භාවනා" වර්ග 4ක් පෙන්වා දෙනවා. ඒවායේ කාර්යයන් අනුව මේ සමාධි භාවනා වර්ග 4 පැහැදිලි කරලා දෙනවා.  අන්න ඒ පැහැදිලි කිරීම නිවන් මඟ තෝරාගැනීමට අවශ්‍ය කරන ඔබට මහත්වූ උපකාරයක් රුකුලක් වේවි.

(මෙය ඉතාමත් කෙටියෙන් විග්‍රහ කිරීමක් පමණයි!  දීර්ඝ වශයෙන් "නිර්වාණ ධර්ම" වෙබ් අඩවිය තුලින් පැහැදිලි කරගැනීම කරගන්නට ඉදිරියේදී කටයුතු කරමු)


1. එක් සමාධි භාවනා ක්‍රමයක් තියෙනවා එය වඩන විට බහුලව වඩන විට, දුටු දහම් සුඛ විහරණය පිණිස හෙවත් ඒ සමාධි භාවනාව ලැබෙන මොහොතේම කායික වශයෙන් සුවයක් අත්දකින්නට හැකි භාවනා ක්‍රමයක්.

2. එක් සමාධි භාවනා ක්‍රමයක් තියෙනවා එය වඩන විට බහුලව වඩන විට, නොයෙක් ආකාරයේ ඥනයන් පහල වීමට ඤාණ දර්ශනය ලැබීමටද හැකියාවක් උපකාරයක් ලැබෙන සමාධි භාවනා ක්‍රමයක්. 

3. එක් සමාධි භාවනා ක්‍රමයක් තියෙනවා එය වඩන විට බහුලව වඩන විට, සිහිය හෙවත් සති සම්පජඤ්ඤය තව තවත් දියණු කරගන්නට හැකියාවක් ලැබෙන සමාධි භාවනා ක්‍රමයක්.

4. එක් සමාධි භාවනා ක්‍රමයක් තියෙනවා එය වඩන විට බහුලව වඩන විට, ආස්‍රව ක්ෂය කිරීමට හැකියාවක් ලැබෙන සමාධි භාවනා ක්‍රමයක්.

එසේනම් ප්‍රථම ධ්‍යානය / පළමු දැහැන, ද්විතීය ධ්‍යානය / දෙවන දැහැන, තෘතීය ධ්‍යානය / තුන්වන දැහැන, චතුර්ථ ධ්‍යානය / සතරවෙනි දැහැන කියන්නාවූ මේ සතර දැහැන් දුටු දහම්හි සුඛ විහරණ හෙවත් ලැබූ ක්ෂණයක් පාසා කායිකවූ සුවයක්ම අත්දැකීම පිණිස භාවිතා කල හැකි සමාධි භාවනා ක්‍රමයක් මිස නිවන් මඟ හෝ නිවීම නොවේ. 
එහෙත් අමතක නොකල යුතුයි මේවාද... මේ කියන සතර දැහැන්ද නිවන් මඟට උපකාරයක් කරගැනීමට මේ ආකාරයේ සමාධි භාවනාවන් වඩන පුද්ගලයාට හැකියාවක් තියෙන බව. 
නිවීම පිණිස තම තමන්ගේ චරිත ස්වභාවය උපකාර කරගැනීමට හැකිවීම නිවන් මගේ තියෙන තවත් සුවිශේෂීත්වයක්ම නිසාම තමයි එසේ කරගන්නට හැකි. 

එසේ නම් යමෙක් ප්‍රකාශ කරනවා නම් සතර දැහැන් නිවීම හෝ නිවෙන මඟ බවට මුලින්ම ඒ ප්‍රකාශ කුමන අර්ථයකින් කරනවාදැයි විමසිය යුතුයි. මන්ද සතර දැහැන් හෝ වේවා අරූපී දැහැන් හෝ වේවා වැඩූ චරිතයක් ඒවා තුලින් නිවන් මඟ තෝරාගෙන නිවීම පිණිස කටයුතු කරගන්නවා නම් ඒ අර්ථයෙන් කියනවාදැයි විමසා බැලිය යුතුයි. නැතහොත් ඒ ප්‍රකාශ සර්ව සම්පූර්ණ නිවන් මඟ හෙවත් නිවීම ලෙසින් මේ දැහැන් / ධ්‍යාන පනවනවාදැයි විමසා බැලිය යුතුයි. 

ඒ ආකාරයෙන් යම් ප්‍රකාශයක ඇති නොගැලපීම මතුපිට මට්ටමකින් හෙවත් පිටකයේ කාරණා වලට අනුව මූලික වශයෙන් විමසා දැනගන්නට හැකියි. එහෙත් මෙය අවබෝධයක් නොවේ. 

බාහිරවූ නිවීමට උපකාර වන දැනුමක් පමණයි. එහෙත් ඒ දැනුමද නිවන් මඟ ලෙසින් පනවමින්, නිවන් මඟ පිටකය අධ්‍යනයයි, පිටකයේ කරුණු පිළිබඳව ඇති ගැඹුරු දැනුම නිවීම යැයි යමෙක් ප්‍රකාශ කලහොත් එයද නිවන් මඟ නොවන බව හඳුනාගෙන ඇසුරුකරන්නට මූලික උපකාරයක් ඔබට මේ ආකාරයේ විමසීමකින් ලැබේවි. 

එසේ නම් නිවන් මඟ පිණිස වැඩිය යුතු, බහුලව වැඩිය යුතු අප තුල නිසැකයෙන්ම පිහිටිය යුතු සමාධි භාවනා ක්‍රමය කුමක්ද?
පංචඋපාදනස්කන්ධයේ උදය වැය අනුව බලමින් විහරණය කිරීම, රූප, වේදනා, සංඥා, සංකාර, විඤ්ඤාණයන්ගේ උදාවීම, වැයවීම අවබෝධයෙන් දැකීමේ සමාධි භාවනාව නිවීම පිණිස වූ නිවන් මඟයි පවතී. මෙන්න මේ සමාධි භාවනාව පිහිටන්නට නම් පංච උපාදනස්කන්ධය සකස් වූයේ කෙසේද? උදාවූයේ කෙසේද? යන හේතු ඵල දහම අවබෝධ කරගන්නට සිදුවෙනවා.
ඒ අවබෝධය ලැබීම පිණිස පංචස්කන්ධය සහ පංචස්කන්ධය උපාදනස්කන්ධයක් බවට පත්වෙන ආකාරය පෙන්වා දෙන සත්ධර්ම දේශනා වලට ශ්‍රවණය කරන්නට සිද්ධ වෙනවා. එය තමන් තුල ක්‍රියාත්මක වන ආකාරය අවබෝධ කරගන්නට සිදුවෙනවා. අන්න මේ කියන සමාධි භාවනාවේ පිහිටනවා. 
එය භාවිතයෙන්, බහුලව භාවිතයෙන් සියලු අස්‍රව ධර්මයන් හෙවත් රාග ද්වේශ මෝහ සියල්ලෙන් සියල්ල ක්ෂය වී විනය සිදුවෙනවා. හෙවත් නිවීම ලැබෙනවා. අවබෝධවූ තැන් පටන්ගෙන පිහිටන මේ සමාධි භාවනාව ක්‍රියාත්මක වන මොහොතක් පාසා ඒ නිවීම අත්දැකගැනීමට හැකියාවක්ද තියෙනවා.

අන්න සූත්‍ර පිටකයේ, මජ්ඣිම නිකායේ 3, මහා චත්තාරීසක සූත්‍ර දේශනාවේ සදහන් වන ආර්ය වූ නිවීම පිණිස වූ සප්‍රත්‍ය වූ සපරිවාර වූ ආර්ය සම්මා සමාධියේ පිහිටනවා.
හැබැයි ඉතින් පංචස්කන්ධය ගැන හෝ පංච උපාදනස්කන්ධ වචන භාවිතා කල පමණින් නැවතත් නිවන් මඟක් කියනවාද ආස්‍රව වැඩෙන මඟක්ම කියනවාද යන්නත් විමසා තෝරාගැනීම ප්‍රඥාවන්තයාගේ කාර්යයක් නිසාම තමයි බුදු හිමියන් පෙන්වා දුන්නේ මේ දහම ප්‍රඥාවන්තයින්ට මිස අඥානයින්ට නොවේ කියලා. 

තම තමන්ගේ ප්‍රඥාවන්තභාවය තමන්ටත් ඔප්පුවෙන්න නම කොතනැකවත් පිහිටන්නෙ නැතිව විවෘතව තමන්ට අවංක වෙලා නිවන් මඟ මතු කරගන්නට කටයුතු කල යුතුයි. 

මේ කියන සූත්‍ර දේශනාවේ ඉතාමත් ගැඹුරු දහම් කොටසක් ගැබ්වී ඇති අතර වචන පද වලට සිරවී තර්ක වාද කරගැනීමෙන් කිසිවෙකුටත් ඵලක් නොවන බවම වටහාගන්නට හැකි ඥානයන් සියලු සතට පහල වේවා යන මෙත් සිතින් යුතුව නවතිමි. 
තෙරුවන් සරණ ලැබ නිවී සැනසීමම වෙත්වා! දහම් අදහම් හඳුනාගෙන නිවී සැනසෙන්නට තෙරුවනේ රැකවරණය නොඅඩුවම ලැබේවා!!!

Monday, June 11, 2018

තමන්ගෙන් අහන්න! (04 කොටස) - මුලින්ම පහර ශ්‍රද්ධා ඉන්ද්‍රියටද???

එහෙනම් ප්‍රවේශමෙන්!
මේ සමහර දේශනා අහන විට අසන්නට ලැබෙන ප්‍රකට කරුණක්... 
මෙකල බහුල දේශකයෝ... 

කියන්නෝ... 
“දැන් හොඳට බලන්න, බුදු පිළිමය කියන්නේ මොකක්ද? සිමෙන්ති ගල් වැලි වලින් එකතු වෙලා හැදුන සංඛතයක්. දැන් හොඳට බලන්න.. මෙච්චර කල් වැන්දේ කාටද?” 

අසන්නෝ... 
“සාධු සාධු අපේ හාමුදුරුවනේ අපිට පිස්සු නේද? දැන් තමයි අවබෝධයට පත්වුනේ... සිමෙන්ති ගල් වැලි වලට වැද වැද නිවන් හෙව්වනේ අපිත්... ඔබවහන්සේලා අපට මහා ආශිර්වාදයක්” 

තවත් විටෙක මෙසේද කියන්නෝ සිටිත්... 
“සිමෙන්ති ගොඩකට වැද වැද චෛත්‍ය කියලා මහා ලොකුවට හදාගෙන නිවන් හොයනවා... මෝඩ වෙන්න එපා... මල් වට්ටි වලට පන්න පන්න අත ගහ ගහා... පිරිකර පූජා කර කර නිවන් යන්න පුළුවන්ද? ඕවා මොන්ටිසෝරි වැඩ...” 

අසන්නෝ... 
“සාධු සාධු දේශකයාණෙනි, අපි වගේ මෝඩයෝ... ඔබවහන්සේලා වගේ උතුමන් පහල වුනේ නැතිනම් කොහොමද අපි මේ දේවල් දැනගන්නේ? ඔබවහන්සේලා අපට මහා ආශිර්වාදයක්” 

කියන්නෝ විටෙක මෙසේද කියති... 
“ඔය වගේ පූජා කරන්න වඳින්න කියලා බුදු හාමුදුරුවෝ කියලා නෑ... ත්‍රිපිටකයේ කොහෙද තියෙන්නේ? පෙන්වන්න බලන්න... (පෙන්වූ කල ඒවා පසුව එකතු කල දෑද යැයි කියති)... ඒ නිසා බුදු හාමුදුරුවෝ නොකියූ දහමක් කියන එක අදහමක් දහමක් විදියට පෙන්වා දීමක්... ඒ විදියට කලාම ආනන්තරීය පාපකර්මයක් වෙනවා... සංඝ භේද සූත්‍ර වල තියෙන්නේ... සංඝ භේදය කියන ආනන්තරීය පාප කර්මයන්ට අහුවෙනවා” 

අසන්නෝ... 
“සාධු සාධු අනේ අම්මෝ අපි බේරුන බේරිල්ලක්... මින් පස්සේ නම් ඔය මෝඩ වැඩ කරන්නේ නෑ... ඔබවහන්සේලා අපට මහා ආශිර්වාදයක්... ඔබවහන්සේ නම් රහතන්වහන්සේ කෙනෙක්ම තමයි” 

මේ ආකාරයෙන් කොතරම් නම් මෙකල සිද්ධ වෙනවාද?
විමසන්න... අහන්න තමන්ගෙන්ම...! 

ඇයි බුදු පිළිමයක්ම උපමාවට ගන්නේ... තමන් ආදරෙයන් ආශාවෙන් රැකගෙන ගෙදර ලස්සනට තියාගෙන ඉන්න වෙනත් පිළිම වර්ග ගන්නේ නැතිව ඇයි බුදු පිළිමයක්ම උපමාවට ගන්නේ? අහන්න තමන්ගෙන්ම...! නුවණින් විමසන්න... 

උදේ දිවා රෑ රැකගන්නට වෙහෙස වෙන ගල් වැලි සිමෙන්ති වලින් සකස් කල ගෙදර ගන්නේ නැතිව... ඇයි මේ ඉදලා හිටලා හෝ වදින්නට යන චෛත්‍යයක්ම උපමාවට ගන්නේ? අහන්න තමන්ගෙන්ම...!  නුවණින් විමසන්න... 

ප්‍රතිරූපකයා පැමිණෙන්නේ ධර්මය වැනි වූ දේ රැගෙනමයි. සංඛතය ගැන අනුමාන හෝ අදහසක් වේ නම් එවැන්නෙක් මේ ආකාරයෙන් ශ්‍රද්ධා ඉන්ද්‍රියට බලපෑම් කරන්නේ නෑ. ශ්‍රද්ධාව යනු ප්‍රඥාවත් සමඟ එකට බැඳුන කාරණයක්. එය නුවණින් විමසා අවබෝධ කරගත යුතුයි. 

“කියන්නෝ කෙසේ කීවත් අසන්නා සිහිබුද්ධියෙන් ඇසිය යුුතුයි”. මේ දේ නොවන නිසාම මේ වන විට ප්‍රතිරූපක එන්නම එන්නම ප්‍රබල වෙමින් මග ඵල ලැබූවන් සේ හැසිරෙන පිරිස බහුල වෙමින් තිබෙනවා. තමන්ට අවංකවම නිවීමක් අවශ්‍ය වේ නම් මේ ඉන්ද්‍රිය ධර්මයන්ගේ ශ්‍රද්ධ, විරිය, සති, සමාධි, ප්‍රඥා බලයන්ගේ වැදගත්කම සහ ඒවා වැඩෙන ආකාරය අවබෝධ කරගත යුතු වෙනවා. සංඛතය පිළිබඳව අනුමාන හෝ ඥානයක් වේ නම් ඔය ආකාරයෙන් ඉහත කී ආකාරයේ කතාවන් ප්‍රකට කරන්නේ නෑ. 

අනවබෝධයෙන් යම් යම් ප්‍රකාශ කරන විට මේ කියන කාරණා ඉස්මතු වෙනවා. තම තමන්ගේ සිත් වල තිබෙන්නාවූ කෙලෙස් කහට නිසාම මේ දේවල් ඉතාමත් නිවැරදි බව තමයි දැනෙන්නේ. රාගයෙන් දැවි දැවී, ද්වේශයෙන් දැවී දැවී... විශේෂයෙන්ම මෝහය ගැන වගක්වත් නැතිව මුලින්ම අවබෝධ කරගත්තා යැයි සිතෙන්නේ බුදු පිළිමය සිමෙන්තියෙන් මැටියෙන් හැදූවක් බවත් එයට වන්දනා කිරීම මුලාවක් බවත්ය. හේතුව තමයි මේ ක්‍රියාවලියට තියෙන අලස බව... ශ්‍රද්ධා ඉන්ද්‍රියේ තිබෙන දුර්වල බව... මේ ක්‍රියාවන් තුල නිවෙන වැඩෙන ආකාරය දැනගන්නට සැබෑම පිරිසිදු සත්ධර්මයට කණ යොමු කරන්න. 

නිතර තමන් අසාගන්නා දේ තමන්ගේ දැනුමෙන් මනින්නේ නැතිව පෙර නොඇසූ විරූ තවමත් තමන් නොදුටු තථාගත සත්ධර්මය හඳුනාගන්නට යොමු කරන්නට. එවිට කවදාවත් වරදින්නේ නෑ. සත්ධර්ම ප්‍රතිරූපක හඳුනාගෙන කොතරම් උත්සාහ කලත් පරදන්නට නොහැකි ප්‍රතිරූපකයන්ගේ ප්‍රබල බව හඳුනාගෙන අප්‍රමාදී වීමට කටයුතු සම්පාදනය කරගන්න! 

අහන්න... තමන්ගෙන්ම... 
තෙරුවණේ අසිරිය හඳුනාගෙන අත්දැකගෙන සැනසෙන්න! 

Sunday, June 10, 2018

අසාගන්නා දේ තුලින් දැනුවත් වීම යථාවබෝධය නොවේ!


“යථාවබෝධය යනු තවත් කෙනෙකුගේ අදහස් හෝ වචන හෝ සිතැඟි නොවේ. යථාවබෝධය මේ සියලු වචන, අදහස්, සිතැඟි, පැහැදිලි කිරීම් ආදිය ඉක්මවා ගියාවූ දෙයකි. යමෙක් යථාවබෝධයෙන් යුතුව යමක් පවසන්නට උත්සාහ දරන විට ඒ සියලුම දෑ ඒ පුද්ගලයාගේ යථාවබෝධයේ ප්‍රක්ෂේපනයක් මිස එය යථාවබෝධය නොවේ. ප්‍රක්ෂේපනයක් පමණි! එබැවින් ඒ ප්‍රක්ෂේපනය ඔස්සේ මං මුලා නොවීමට අසන්නා දක්ෂ විය යුතුයි. එසේ නොවුනහොත් යථාවබෝධය ලෙසින් තවත් යථාවබෝධයෙන් යුතුව යමක් ප්‍රකාශ කරන්නවුන්ගේ ප්‍රක්ෂේපනයන් අහුලාගෙන ඒවා එකතු කොටගෙන තමනුත් යථාවබෝධයට පත්වූ සෙයක් දැනෙන්නට හැකිය. අනතුර හැඳිනගන්නා දක්ෂයා යථාවබෝධය ලබයි!” 

මේ කියමන තුලින් කියන්නට උත්සාහ කල අදහස අපහැදිලි යමෙක් වේ නම්, ඒ කෙටියෙන් පැවසූ දේ තරමක් විග්‍රහ කර දෙන්නට උත්සාහයක් දරන්නම්. 

යථාවබෝධය යනු අත්දැකීමක්. මෙසේ කියන විටදීද එය වරදවා අදහස ගැනීමට ඇති හැකියාව ගැන තමයි කියන්නට උත්සාහ කලේ. අත්දැකීම විග්‍රහ කරන්නට නොහැකියිනේ. එවිට ඒ සෑම ප්‍රකාශයක් තුලම තියෙන්නේ අත්දැකීම නිසාම තමන්ට දැනුන සහ ඒ හේතුවෙන් තමන් අත්දකින යම් යම් කාරණාම මිස ඒ ලැබූ අත්දැකීමේ ස්වභාවය නොවේ. මන්ද එය කිසිම විටෙක වචනයට ගලපන්නට හැකි කාරණයක් නොවන නිසාමයි. 

වචන සකස් වුනේ පැවැත්ම පිණිස. යම් අදහසක් ප්‍රකාශ කරගැනීමේ පහසුව පිණිස සකසා ගත් වචන පද තුලින් අදහස නිවැරදිව ප්‍රකාශ කරනවා යන්න කරන්නට නොහැකි දෙයක්. මන්ද ඒ අදහස ප්‍රකාශ කරන්නට සකස් කරගත් බහුතරයක් මේ යැයි සම්මත කරගත් ආකාරයක් මිස එය ඒ අදහස නොවේ. 

උදාහරණයකට මෙහෙම හිතන්නකෝ. ලෝකයේ මායාකාරී ස්වභාවය අත්දැකීමක් බවට පත්ව යථාර්ථ අවබෝධ කරගන්න කෙනෙක් ඒ ස්වභාවය විග්‍රහ කරන්නේ බොහෝ විට තමන් විසින් ඒ මායාකාරී ලෝකය දකින නොයෙක් නොයෙක් ආකාර තුලින්. ඒ කියන්නේ යථාවත් ක්‍රියාවලිය අත්දැකීමක්ව අවබෝධයෙන් සිටින්නෙක් ඒ ස්වභාවය ගැන විග්‍රහ කරන්නට හැකි ආසන්නතම ක්‍රියාවලියක් උපමාවක් ලෙසින් ගෙන ඒ ක්‍රියාවලිය විග්‍රහ කරන්නට උත්සාහ කරනවා. 

මිරිඟුව කියන උපමාව හිතමුකෝ. මේ සියලු දේ මිරිඟුවක් වගේ හෝ එතැන සිදුවන ක්‍රියාවලිය හෝ තුලින් මිරිඟුව තුල තිබෙන මායාකාරී ස්වභාවයෙන් ප්‍රකාශ කරනවා. එවිට අසන්නා විසින්, “ආ ඇත්ත තමයි ලෝකය මිරිඟුවක් වගේ මායාකාරී තමයි. එය ඔප්පු වෙන මෙන්න මේ මේ අවස්ථාද තිබෙනවා” යැයි ගත් විට ඒ ගන්නේ අර යථාවබෝධයෙන් යුතුව ප්‍රකාශ කල කෙනා ප්‍රක්ෂේපනය කල යම් කාරණයක් තුලින් මිස ඒ ලැබූ යථාවබෝධයෙන් නොවේ. 

අවබෝධය ලැබූ කෙනා යම් යම් දෑට ගලපමින් එය විග්‍රහ කරන විට අසන්නාද ඒ ඔස්සේ සිතා ගලපා ඒ දෑ තුලින් යථාර්ථය මෙය යැයි අනුමාන කරමින් ලබන ඥානයක් මිස යථාවබෝධය නොවේ. ඉන්පසුව එවැනි ආකාරයෙන් ලැබූ දැනුම යථාවබෝධය ලෙසින් රැවටෙනවා. ඉන්පසුව ඒ අය නැවත යථාවබෝධය ලැබූ අය මෙන් අන් අයට විග්‍රහ කරනවා. එවිට අර දැනුමෙන් රැස් කරගත් දේ ඉදිරිපත්වන ස්වභාවය ඉස්මතු වෙනවා. 

එහෙත් එවිට දෙසන්නෙක් බවට පත්ව ඇති නිසා එතැන සිදුවූ වරද වරද ලෙසින් දැකගන්නටද නොහැකි ආකාරයෙන්ම ඒ දැනුම අවබෝධයක් ලෙසින් වරදවා වටහාගෙන නිගමනයට පත්ව අවසන්. ඒ දේ අසන්නෝ මේ දැනුම අවබෝධ කරගත් කාරණයක් ලෙසින් අසා නැවතත් යමක් පෙර ආකාරයෙන්ම ගලපා අවබෝධ කරගන්නවා. මේ ආකාරයෙන් තමයි සිදුවන්නේ. මෙන්න මේ අනතුර හඳුනාගන්නට දක්ෂ විය යුතුයි. 

කෙටියෙන් කියනවා නම් යථාවබෝධයට පත්වූවෙක් තුලින් බොහෝ විට දුක්ඛ ආර්ය සත්‍යයට හෙවත් ඵලයට අදාල කාරණා බොහෝ විට ප්‍රක්ෂේපනය විය හැකියි. දුක්ඛ සමුදය ආර්ය සත්‍යයය හෙවත් හේතුව පිළිබඳව විග්‍රහ කිරීමේදීද යොදාගන්නට සිදුවන්නේ මේ කියන්නාවූ ඵලයට අදාල කාරණා තුලින් තෝරාගත් යම් යම් අවස්ථාවන් උපමාවන් වශයෙන් ඉදිරිපත් කරමිනුයි. 

එවිට අසන්නාට නිවැරදිව ශ්‍රවණය නොකරන විට ඒ පුද්ගලයා ඉන්ද්‍රිය ගෝචර මට්ටමක්ම එයින් තෝරාගෙන එය තමයි අවබෝධය ලෙසින් වරදවා වටහාගන්නවා. ඉන්ද්‍රිය ගෝචර කියන විට මන ඉන්ද්‍රියයද ඇතුලත්. යථාවබෝධය කියන්නේ ප්‍රඥා ගෝචර කාරණයක් මිස මන ඉන්ද්‍රිය හෝ වෙනත් ඉන්ද්‍රියයන්ට ගෝචර කාරණයක් නෙවේ. ඒ නිසාම තමයි යමක් ඔස්සේ හිතලා හිතලා යථාර්ථය කියන දේ අවබෝධ කරගන්නට නොහැකි. ඒත එය බොහෝ දෙනෙක් හඳුනාගන්නට දක්ෂ නෑ. 

ඉතින් මෙන්න මේ වගේ අකරතැබ්බයක් තමයි බහුලවම වෙන්නේ. අනතුර හඳුනා නොගත්නිසාම අවසානයේ යථාර්ථය යනු අවබෝධ කරගන්නට බොහෝම පහසු අපහසු වුවත් ටිකක් වෙහෙස වුවොත් කරගන්නට හැකි කාරණයක් සේ තමයි මේ වන විට හඳුනාගෙන තිබෙන්නේ. 

ඉතින් මේ කියූ කාරණාවන්ද ප්‍රක්ෂේපනයක්ම මිස කියන්නට අවශ්‍ය කරන කාරණය නිවැරදිව ප්‍රකාශ වන අවස්ථාවක් නොවේ යන්න දන්නේද වැටහෙන්නේද මේ කාරණය ප්‍රකාශ කරන්නාටම තමයි. 

Friday, June 1, 2018

තමන්ගෙන් අහන්න! (03 කොටස) - මතයට අනුවයි දහමේ ඇසුර!!!

ඔන්න එදිනෙදා කතාවක... 
“ ඒ ස්වාමීන්වහන්සේට පිළිකාවක් / දරුණු අසනීප තත්වයක් / හැදිලා අනේ අපවත් වුණේ” 

ඒ ස්වාමීන්වහන්සේගේ අනුගාමිකයා: 
"පෙර කල කර්ම විපාකනේ අනේ... උතුමන්ටවත් ගැලවීමක් නෑ."

ඒ ස්වාමීන්වහන්සේගේ විරුද්ධවාදියා: 
"ධර්මය විකෘති කරන කොට, චීවරය දරාගෙන හරියට හැසිරුනේ නැතිවුණාම... ඔහොම තමයි වෙන්නේ... ධර්මයෙත් තියෙනවානේ ඔහොම වෙනවා කියලා... කුණු වෙලා මැරෙන්න වෙන්නේ...සෙල්ලං නෑ ධර්මයත් එක්ක සෙල්ලං කලාම "

ඔය දෙපාර්ශවයටම නැති අප්‍රමාදීව ධර්මයේ හැසිරෙන්නා:
දෙපාර්ශවයටම සත්ධර්මය තුලින් නිවී සැනසෙන මඟ විවර කර දීමේ අරමුණින් යුතුව - සත්ධර්මයට අනුව හේතුවට අනුව ඵලය ලැබෙනවා. සම්මා සම්බුදු පියාණන්වහන්සේට උතුම් රහතුන්වහන්සේලාට වුණත් එය පොදු කරුණක්. ඒ නිසා මතුපිට කාරණා තුලින් තම තමන් ඉන්නා මතයන් තුලින් තීන්දු තීරණ නොගත යුතුයි.  පෙර සිදුකල කර්ම විපාකයන්ට අනුව යහපත් අයහපත් ලෙසින් අප මැනගෙන ඉන්න විපාක ගෙන දෙනවා.  ඒක තමයි ක්‍රමය.  ඒ නිසා මේ ආකාරයෙන් පුද්ගලත්වයෙන් ගෙන නිගමනයන්ට පත්වෙලා කටයුතු නොකල යුතුයි.  ධර්මයට අනුව විමසා බැලිය යුතුයි!

ඒ ස්වාමීන්වහන්සේගේ අනුගාමිකයා: 
"සාධු... සාධු... සාධු... ඒකම තමයි අපිත් මේ කියන්නේ"

ඒ ස්වාමීන්වහන්සේගේ විරුද්ධවාදියා: 
"ආ... ඔය ඉන්නේ තව එකෙක්... අර ගොඩේම තමයි... අනුගාමිකයෝ වෙලා ධර්මයත් යොදාගන්නවා වාසියට... ඕකූන්ටත් වෙන්නේ ඔය විදියටම මැරෙන්න තමයි... "

මේ අතර විරුද්ධවාදියා ඇසුරු කරන ඔහු / ඇය අනුගාමික වූ හිමි නමක්ද ඒ ආකාරයෙන් රෝගාතුර වෙයි... 

පෙර ස්වාමීන්වහන්සේගේ විරුද්ධවාදියා මෙවර මේ ස්වාමීන්වහන්සේගේ අනුගාමිකයාගේ චරිතය හොබවයි: 
පෙර කල කර්ම විපාකනේ අනේ... උතුමන්ටවත් ගැලවීමක් නෑ. 

පෙර ස්වාමීන්වහන්සේගේ අනුගාමිකයා මෙවර මේ ස්වාමීන්වහන්සේගේ විරුද්ධවාදියාගේ චරිතය හොබවයි: 
"ධර්මය විකෘති කරන කොට, චීවරය දරාගනෙ හරියට හැසිරුනේ නැතිවුණාම... ඔහොම තමයි වෙන්නේ... ධර්මයෙත් වෙන්නේ... කුණු වෙලා මැරෙන්න වෙන්නේ... අපේ උතුම් හාමුදුරුවන්ට කියපු ඒවාටම තමයි ඔහොම වුනේ... ඔහොම වෙලා මදි..." 


ඔය දෙපාර්ශවයටම නැති අප්‍රමාදීව ධර්මයේ හැසිරෙන්නා:
දෙපාර්ශවයටම සත්ධර්මය තුලින් නිවී සැනසෙන මඟ විවර කර දීමේ අරමුණින් යුතුව - සත්ධර්මයට අනුව හේතුවට අනුව ඵලය ලැබෙනවා. සම්මා සම්බුදු පියාණන්වහන්සේට උතුම් රහතුන්වහන්සේලාට වුණත් එය පොදු කරුණක්. ඒ නිසා මතුපිට කාරණා තුලින් තම තමන් ඉන්නා මතයන් තුලින් තීන්දු තීරණ නොගත යුතුයි.  පෙර සිදුකල කර්ම විපාකයන්ට අනුව යහපත් අයහපත් ලෙසින් අප මැනගෙන ඉන්න විපාක ගෙන දෙනවා.  ඒක තමයි ක්‍රමය.  ඒ නිසා මේ ආකාරයෙන් පුද්ගලත්වයෙන් ගෙන නිගමනයන්ට පත්වෙලා කටයුතු නොකල යුතුයි.  ධර්මයට අනුව විමසා බැලිය යුතුයි!

පෙර ස්වාමීන්වහන්සේගේ විරුද්ධවාදියා මෙවර මේ ස්වාමීන්වහන්සේගේ අනුගාමිකයාගේ චරිතය හොබවන්නා: 
"සාධු... සාධු... සාධු... ඒකම තමයි අපිත් මේ කියන්නේ."

පෙර ස්වාමීන්වහන්සේගේ අනුගාමිකයා මෙවර මේ ස්වාමීන්වහන්සේගේ විරුද්ධවාදියාගේ චරිතය හොබවන්නා: 
"අපේ හාමුදුරුවෝ අපවත් වෙච්චවෙලාවෙත් ඔය විදියට කිව්වා... මෙතනත් ඒකම කියනවා... කිසිම ස්ථිර පදනමක් නෑ... ප්‍රතිපත්තියක් නෑ... තනි වචනයක් නෑ... එක එක වෙලාවට එක එකාගේ පැත්තට කතා කරනවා... ඔය වගේ එවුන්ව විශ්වාස කරන්න එපා. නැත්නම් මේ වගේ පෙනී පෙනී ඵල දුන්න අවස්ථාවකදිත් එහෙම කියයිද? ධර්මය වාසියට අරගන්න ධර්ම ප්‍රතිරූපකයෝ... නැති කරලා දාන්න ඕන මෙවුන්ව."

දැන් ඉතින් තමන්ගෙන්ම අහන්න!!!

මේ වගේ කොතරම් නම් අවස්ථා තමන්ට අත්දැකගන්නට හැකිවෙලා තියෙනවද? තමන් මේ ආකාරයට කොතරම් නම් හැසිරෙනවද? පුද්ගලත්වයන් සරණ යෑම තුලින්... ධර්මය අවබෝධයෙන් යැයි සිතාගෙන ධර්ම කරුණු රැසකින් දැනුවත් වී සත්ධර්ම ප්‍රතිරූපකයක් බවට පත්වෙමින් සත්ධර්මය සහ සැබෑවටම ඒ සත්දහමේ අප්‍රමාදීවූවන්ට කොතරම් නම් ගරහනවද? සත්ධර්මයේ හරය විමසා බලනවා වෙනුවට තම තමන් ගත් මතයකින් ධර්මය මනිනවා නොවේද? 

පුද්ගලයා අනුගාමිකයෙක්ද නැත්ද යන්න ඔවුන් පවසන වචන තුලින් දැකිය හැකි දෙයක් නොවේ. ප්‍රඥාවන්තයා කිසිවෙකුගේ අනුගාමිකයෙකු නොවන අතර සත්ධර්මය ගුරු තනතුරේ තබාගෙන තෙරුවනෙන් ලැබිය යුතු නිසි ප්‍රයෝජනය අප්‍රමාදීව ලැබගන්නෙකි. 

තමනුත් එසේදැයි විමසා බලත්වා! අවංකවම තම තමන්ගේ අඩුපාඩු දැක හැඳින නිවැරදි කරගෙන අප්‍රමාදීව දහමේ හැසිරෙත්වා! මේ වචන පද අතර සැඟව ඇති අදහසම වටහාගෙන මෙවන් කාරණා හමුවේ කොතරම් නම් මේ ආකාරයෙන් හැසිරෙනවාදැයි තමනුත් එසේ කරනවාදැයි තමන්ගෙන්ම අසා විමසා බලත්වා! 

නැණවත්ව විමසන්න!!! අහන්න... තමන්ගෙන්ම!!! 

Thursday, May 17, 2018

සීලයට උපකාර වන මල් පූජාවෙන් නිවන් දකිමු!


පෙර නොඇසූ විරූ දහම් විදසුනට ලක්වෙමින් සිදුකරන මල් පූජාව සීලය නැඟෙන්නට උපකාර වන්නේ කෙසේදැයි විමසා බලන්නට මෙම දහම් කොටසින් යොමුවෙමු.

"මලක් කියන්නේ ගසක පුංචි කාලයකට පමණක් සීමාවූ අංගයක්. එසේ පුංචි කාලයකට පමණක් ගසේ මල් පිපෙන්නට හේතුවක් තියෙනවා. ගසේ පැවැත්ම පිණිස උපකාර කරන්නේ ගසේ මලයි. මල ලස්සනට, සුවඳවත්ව, වර්ණවත්ව, සියුමැලි පෙති ඇතිව, රසැති පැණි ඇතිව නන් ආකාරයෙන් ආකර්ශණීය ලෙසින් පිපී තියෙන්නේ නිකමට නොවේ. ඒ ලස්සනට ආකර්ශණය වන බඹරුන් සමනළයන් මී මැස්සන් මලට ලංවෙන්නේ ඒ සුවය විඳගන්නටයි. ඒ එකතුවත් එක්කම පරාගනය කියන්නාවූ ගහක පැවැත්ම පිණිස සකස් වී ඇති ක්‍රියාවලිය සිදුවෙනවා. 

ප්‍ර‍ථිපලය නන් ආකාරයෙන් ඵල දැරීමයි. ඵල දැරීමත් සමඟින්ම ලස්සන පිපී තිබුන මල පරවෙලා වේලිලා කැතවෙලා යනවා. මොහොතකට සිතන්න කොතරම් කෙටි කාලයකටද මේ ආකර්ශණීය ලස්සන තිබුනේ? මොහොතකට මෙසේ හැඩ ගැන්වී සකස් වුනේ පැවැත්ම සකසා දෙන්නටමයි. ඒ මල නැතිවුනොත්? කඩා බිඳ දැමුවොත්? ඒ ගසට පැවැත්මක් නැතිවෙනවා. එහෙම නේද? 

දැන් නුවණින් සිතන්න... රූපයක් ඇස ගැටෙන මොහොතක් පාසා, ශබ්දයක් කණ ගැටෙන මොහොතක් පාසා, ගන්ධයක් නාසයට ගැටෙන මොහොතක් පාසා, රසයක් දිව ගැටෙන මොහොතක් පාසා, ස්පර්ශයක් කය ගැටෙන මොහොතක් පාසා, සිතිවිල්ලක් මන ගැටෙන මොහොතක් පාසා සිද්ධ වෙන්නෙත් මෙන්න මේ පරාගනයමයි. “චක්ඛුංච පටිච්ඡ රූපේච උප්පජ්ජති චක්ඛු විඤ්ඤාණං“ කියන්නාවූ ගැඹුරු ධර්මයමයි මේ මලින් උපමා කර අවබෝධ කරගන්නට හැකිවන්නේ. ක්ෂණයකට මොහොතකට ඇසක් නිර්මාණය වන්නේ ලස්සන මලක් වගේ... ඒ ඇසට රූප ආකර්ශණය වුනේ මලට රොන් සොයා පැමිණි බඹරුන් වගේ... ඒ ඇස නමැති මලත් රූප නැමැති බඹරා යන දෙදෙනාගේ එකතුව තුලින් පරාගනය වී සකස් වුනේ චක්ඛු විඤ්ඤාණය නැමැති මායාවමයි. ඒ මායාව එසේ මෙසේ එකක් නොවේ. ඒ මායව තුල සකස් වුනේ භවය නමැති භයානක තත්වය ගෙන දෙන බීජයමයි. මේ මායාව සකසා... භව බීජය සකසා ඇස නැමැති මල පරවෙනවා... විනාශ වෙනවා...ඒත් සමඟම එයට ඇඳුන රූපය නමැති බඹරාද විනාශ වෙනවා. ඒත් ඒ දෙදෙනාගේ එකතුවෙන් සකස්වූ මායාව පැවැත්මක් පිණිස බීජයක් සකසන්නට යෙදුනා. 

එසේනම් දැන් මල් කඩා දමන්නට කාලයයි. පරාගනය කරමින් පැවැත්මක් සකසමින් අසංවරව යන්නාවූ මේ ඇස, කණ, දිව, නාසය, කය සහ මන කියන්නාවූ මල් කඩා බිඳ දමන්නට දැන් කාලයයි. ඒ මල් කඩා නොදැමුවොත් සිල් බිඳෙන්නේ ඔබේමයි. සීලයෙන් තොරව කෙසේ නම් සැනසීමක් සහනයක් සතුටක් ලබන්නද? එසේ නම් මේ මල් කඩා බිඳ දමා ඒවාට ඇඳෙන රූප ශබ්ධ ගන්ධ රස ස්පර්ශ ධර්ම කියන්නාවූ බඹරුන්ද පන්නා දමන්නට අර්ථවත්ව ගැඹුරු දහම් නුවණින් දැකගන්නට අදිටන් කරගත යුතුයි. 

භව බීජය නසන්නට මේ මල් කඩා දමන්නට උපකාර කලේ ඒ උතුම් තෙරුවණමයි. ඒ තෙරුවණට නැමී මේ මල් කඩන විට සිත තුල නැඟී එන්නේ සීලයක්මයි. අර්ථවත්ව ධර්මාවබෝධයෙන් යුතුව සිත් තුල සැබෑ ප්‍ර‍ඥාවෙන් යුතු සීලය මෙසේ මතු කරගන්නට තම තමන්ටම පොරොන්දු වෙමින් මල් පූජාවන් කරන්නේ නම් ඔබගේ මෙලොව පරලොව දිවිය සරු වී නිවී සැනසීමටම පත්වීමටද එය උපකාරයක් කුසලයක් වනු නොඅනුමානයි!"

     

Saturday, May 5, 2018

සංසාර පැවැත්ම


සංසාර පැවැත්ම

මොහොතක් පාසා සකස් වෙන සංසාර පැවැත්ම පිළිබඳව අවබෝධයක් ලබාගැනීම පිණිස “තණ්හා මූලක“ සූත්‍ර දේශනය ඇසුරෙන් සකස් කරන ලද රූපමය දහම් විග්‍රහයකි. ගැඹුරු පෙර නොඇසූ විරූ දහමේ සියුම් බව අවබෝධ කරගැනීමටත්, දහම් මඟ අපට සිදුවන අඩුපාඩු සහ මඟ හැරෙන කාරණා හඳුනාගැනීම පිණිසත් මේ වෑයම උපකාරයක්ම වේවා!

  
      



මෙය දහම් විග්‍රහයකි. කොටස් වශයෙන් දමා තිබෙන්නේ එක දිගට දහම් විමසන්නට තරම්වත් මෙකල බොහෝ පිරිසකට විවේකයක් නැති නිසාවෙනි. අවසාන කොටස සම්පූර්ණ දහම් විග්‍රහයයි.  එය පැය 3.34ක විග්‍රහයකි.  කොටස් වශයෙන් දමා තිබෙන්නාවූ දහම් කොටස්හි තැනින් තැන බලා ඉක්මන් තීරණ නොගෙන පිලිවෙලින් කොටස් වශයෙන් ඇසුරු කරන්නේ නම් ඔබට මේ වෑයෙමෙන් යහපතක් ලබාගත හැකිවේවි! තෙරුවන් සරණින් නිවනම වෙත්වා!